HVI timbog sa Taguig City drug ops halos 4M na halaga ng shabu nakumpiska
Napasakamay ng mga operatiba ng Taguig City Police Station Drug Enforcement Unit (SDEU) ang isang High-Value Individual (HVI) at nakumpiska ang halos 4-milyong halaga ng umano’y shabu sa ikinasang buy-bust operation sa Block 259 Lot 1, Diamond Street, Barangay Pembo sa nasabing lungsod.
Ang suspek ay kinilalalang si alyas “Rowel,”26-anyos, at residente sa naturang barangay.
Ang operasyon ay personal na sinubaybayan ni Taguig CPS Officer-in-Charge Col Byron F. Allatog kung saan narekober ng otoridad ang 565.6 na gramo ng hinihinalang shabu na nagkakahalaga ng P3,846,080.00; buy-bust money; coin purse; leather wallet; Tess bag; at cellular phone.
Agad tinurn-over ang mga ebidensiya sa Southern Police District Forensic Unit para sa chemical analysis at validation.
Kasalukuyang nakakulong ang suspek sa Taguig CPS at nakatakda siyang sampahan ng kasong paglabag sa Comprehensive Dangerous Drugs Act of 2002.
Binigyang-diin ni Col. Allatog na ang pagkaaresto ng suspek ay resulta ng kanilang agresibong paninindigan na labanan ang ilegal na droga alinsunod sa atas ni Mayor Lani Cayetano na iprayoridad ang pagdakip sa mga high-value personalities at gawing drug-free ang Taguig.
“This successful operation is a manifestation of the persistent and brave work of our officers on the ground,” pahayag naman ni SPD Acting District Director BGen Randy Y. Arceo.
Tiniyak pa ni BGen Arceo sa publiko na mananatili ang SPD sa pangako nitong maigting na kampanya laban sa lahat ng drug personalities upang siguruhin ang kaligtasan at seguridad ng bawat komunidad sa ilalim ng kanyang hurisdiksiyon. (Bhelle Gamboa)
