Mga kongresistang dawit sa flood control mess iimbitahan na ng DOJ

Nakatakda nang padalhan ng imbitasyon ng Department of Justice ang mga kongresistang nadawit sa anomalya sa flood control projects.

Ayon kay Justice Secretary Jesus Crispin Remulla, ang mga iimbitahang kongresista ay base sa mga pahayag ng mag-asawang Discaya at mga dating opisyal ng Department of Public Works and Highways sa kanilang mga sinumpaang salaysay.

Sinabi ni Remulla na iimbitahan muna ang mga kongresista at kung tatanggi silang humarap ay saka naman sila ipa-su-subpeona sa National Bureau of Investigation.

Sa testimonya pa lang ng mag-asawang Discaya, labingpitong (17) kongresista na ang napangalanan.

Ayon sa kalihim, pinag-aaralan din ng DOJ ang testimonya ni dating DPWH Undersecretary Roberto Bernardo sa pagdinig ng Senado na nagbanggit din ng pangalan ng mga incumbent at dating senador. (DDC)