Ipapataw na suspensyon ng Kamara naunahan ng pagbibitiw ni Zaldy Co
Sususpendihin na dapat ng Kamara si Ako Bicol Partylist Representative Zaldy Co kung hindi pa din ito uuwi ng bansa matapos ang ultimatum na ibinigay ng Kamara.
Pero ayon kay House Speaker Bojie Dy III, nagulat ang liderato ng Kamara na inunahan na ito ng pagbibitiw ni Co.
Ayon kay Dy, kahit pa nagbitiw bilang kongresista si Co, kailangan niya pa rin talagang umuwi ng bansa, at sagutin ang mga isyung ibinabato sa kaniya.
Sinabi ng House Speaker na sa ngayon ay walang impormasyon ang Kamara sa kung nasaan ang eksaktong lokasyon ngayon ni Co.
Aniya, wala man lang pasabi si Co kung saang lugar siya naroroon dahilan para bigyan na siya ng ultimatum ng Kamara para siya ay umuwi at harapin ang mga akusasyon laban sa kaniya.
Sinabi din ni Dy na “personal leave” ang inihain ni Co nang magsumite siya ng leave of absence sa Kamara at walang naka-specify doon na magpapagamot siya. (DDC)
