DOJ hihirit ng Blue Notice sa Interpol vs Rep. Zaldy Co

Kinumpirma ng Department of Justice na ihihirit nito sa International Criminal Police Organization o Interpol ang pagpapalabas ng Blue Notice laban kay Ako Bicol party-list Rep. Zaldy Co.

Ayon kay DOJ spokesperson Mico Clavano, iniutos na ni Justice Secretary Jesus Crispin Remulla ang pag-a-apply para sa Blue Notice mula Interpol.

Ang hakbang ayon kay Clavano ay batay sa takbo ng imbestigasyon ng senate Blue Ribbon Committee at base din sa rekomendasyon ng National Bureau of Investigation na i-prosecute at isailalim sa case build-up si Co at 20 iba pang personalidad.

Sa ilalim ng Interpol Notices, kapag nag-isyu na ng Blue Notice laban kay Co, maaaring makalap ang mga impormasyon tungkol sa mambabatas, kabilang ang kaniyang kinaroroonan at ang kaniyang mga aktibidad habang nasa labas siya ng bansa.

Ang mga impormasyon ay ibabahagi naman ng Interpol sa mga otoridad sa Pilipinas. (DDC)