Sen. Nancy Binay pumalag sa akusasyon ng dating DPWH Usec.

Pumalag din si dating Senador Nancy Binay sa pagdadawit sa kaniya ni dating Department of Public Works and Highways Undersecretary Roberto Bernardo sa anomalya sa flood control projects.

Sa pagharap niya sa Senate Blue Ribbon Committee sinabi ni Bernardo na isang staff umano ni Binay ang nakipag-ugnayan sa kanya taong 2024 para humingi ng 15 percent kickback na nagkakahalaga ng 37 million pesos na idineliver sa bahay ng dating senadora.

Sa pahayag ni Binay, sinabi nitong nagulat at nalungkot siya na idinawit ang kaniyang pangalan sa anomalya.

Wala aniyang katotohanan ang alegasyon at tahimik lamang siyang nagtatrabaho bilang Mayor ng Makati.

Ayon kay Binay madali lamang maglahad ng mapanirang salaysay pero sa kaniyang panunukulan bilang public servant ay hindi aniya kailanman nabahiran ang kaniyang rekord. (DDC)