Suspensyon kay GSIS President Jose Arnulfo Veloso binawi na ng Ombudsman

Binawi ng Office of the Ombudsman ang ipinataw na preventive suspension laban kay Government Service Insurance System President Jose Arnulfo “Wick” Veloso kaugnay ng kwestyunableng 1.4-billion pesos na transaksyon sa Alternergy Holdings Corporation.

Ipinataw ng Ombudsman ang anim na buwang suspensyon kay Veloso at anim na iba pa noong July 11.

Sa kautusan ng Ombudsman, nakasaad na walang sapat na basehan na magpapatunay na maiimpluwensyahan ni Veloso ang imbestigasyon sa kaso habang siya ay nananatili sa kaniyang pwesto.

Maliban kay Veloso binawi na din ng Ombudsman ang suspensyon sa apat na iba pang respondents na sina Jason Teng, Mary Abigail Cruz-Francisco, Jaime Leon Warren, at Alfredo Pablo.

Ang dalawa pang respondent na sina Michael M. Praxedes at Aaron Samuel C. Chan, ay wala na sa GSIS. (DDC)