200 gramo ng shabu at mga baril nakumpiska ng SPD sa Taguig drug bust

Nagsagawa ng buy-bust operation ang Southern Police District (SPD) na nagresulta ng pagkaaresto ng tatlong high-value drug suspects at nakumpiska ang 200 na gramo ng umano’y shabu na nagkakahalaga ng P1,360,000.00 at dalawang baril sa Taguig City.

Kinilala ang mga naarestong suspek na sina alyas Maggy, 31-anyos; alyas Allen,20-anyos; at alyas Christian, 21-anyos.

Ayon sa report ang operasyon ay ikinasa ng District Drug Enforcement Unit (DDEU-SPD) at District Intelligence Division (DID-SPD) sa koordinasyon ng Taguig City Police Sub-Station 4, sa isang fast-food restaurant sa Cayetano Boulevard, Brgy. Ususan sa nasabing lungsod.

Nakumpiska ng otoridad ang umano’y ilegal na droga, baril at mga bala, buy-bust money, at personal items kabilang ang isang red Mitsubishi Xpander.

Ang mga suspek ay nasa kustodiya ng DDEU-SPD habang inihahanda ang pagsasampa ng kasong Comprehensive Dangerous Drugs Act of 2002 at Comprehensive Firearms and Ammunition Regulation Act laban dito.

Binigyang-diin ni PBGEN Randy Y. Arceo, Acting District Director ng SPD ang importansiya ng operasyon.

“This successful operation is a testament to the dedication of our police officers in eradicating illegal drugs and firearms from our communities. The SPD remains steadfast in its commitment to ensuring the safety and security of our citizens, and we will continue to be relentless in our fight against all forms of criminality,” sabi ni BGen Arceo. (Bhelle Gamboa)