800 Las Piñeros nabenepisyuhan ng auxiliary feeding program ng Las Piñas LGU

Umabot sa kabuuang 800 na Las Piñeros ang nabenepisyuhan sa auxiliary feeding program ng Las Piñas City government na isinagawa sa Madrigal Covered Court, Barangay Daniel Fajardo.

Sa pamamagitan ng inisyatiba nina Mayor April Aguilar, Vice Mayor Mel Aguilar, at ng City Council, ang programang ito ay nagsisilbing suporta sa kalusugan at nutrisyon ng mga bata at kanilang pamilya sa komunidad.

Ang mga benepisyaryo ay tumanggap ng masustansiyang pagkain na rice topping pork steak at bottled water.Nabatid na ang hot meals ay maingat na inihanda at ipinamahagi sa tulong ng Barangay Nutrition Scholars. Ang auxiliary feeding program ng lungsod ay pinangangasiwaan ng City Nutrition Office sa ilalim ng liderato ni OIC at City Nutrition Action Officer Dr. Julio P. Javier II.

Umagapay naman sa aktibidad si Brgy. Captain Dolphy Cristobal kasama ang mga kagawad nitong sina Melvin Cristobal, Irish Alinigue, Bernard Abersosa, Archie Casimiro, Bhong Ello, at Rodelyn Gonzales upang ipakita ang kanilang buong suporta.

Inihayag ni Mayor April na ang nutrisyon ay napakahalaga para sa kapakanan ng mga bata at kanilang magulang kaya muli nitong tiniyak sa mga Las Piñero na tuluy-tuloy ang Pamahalaang Lungsod sa paghahatid ng mga programang nagsusulong ng kalusugan at pangangalaga sa komunidad. (Bhelle Gamboa)