Halos 50 graduates ng training center ng Las Piñas City binigyan ng libreng kagamitan sa kabuhayan
Sa inisyatiba ni Mayor April Aguilar nasa halos 50 na bagong graduates mula sa Las Piñas City Manpower Training Center ang nakatanggap ng libreng tools at equipment na tulong sa kanilang pagsisimula ng sariling negosyo sa ilalim ng temang “Bagong Buhay, Bagong Simula.”
Ang programang ito ay nagbibigay ng livelihood starter kits para sa bawat benepisyaryo sa napiling larangan para umpisahang gamitin ang natutuhang kasanayan at matulungan din ang kanilang pamilya.
Ang mga benepisyaryo ay nakakumpleto ng kanilang mga kurso sa bread and pastry, hairdressing, massage therapy, shielded metal arc welding, automotive servicing, cookery, electrical installation and maintenance, food and beverage, motorcycle small engine servicing, at refrigeration and air conditioning.
Kasabay nito, isang job fair ang isinagawa sa pamamagitan ng suporta ng Jammas Incorporated kung nagbukas ng mas maraming oportunidad para sa mga graduates upang makakuha ng trabaho. Ang kaganapan ay dinaluhan ni LPCMTC Training Administrator Engr. Noel Cuevas kasama ang mga consultant na sina Renato Dumlao, Alfredo Teodosio, at Cornelio Sapon.
Binigyang-diin ni Mayor April ang kahalagahan ng livelihood and skills training sa pag-aangat sa pamumuhay ng mga Las Pin̈ero kung saan prayoridad ng lokal na pamahalaan ang mga programang mas magpapabuti sa mga residente para abutin ang kaunlaran at katatagan. (Bhelle Gamboa)
