3 timbog ng NBI sa ilegal na pag-aalok internet service

Arestado ng National Bureau of Investigation ang tatlong katao na ilegal na nag-aalok ng internet services sa Cavite at La Union.

Ikinasa ang operasyon makaraang magreklamo sa NBI Cybercrime Division ang isang internet service provider laban sa suspek na gumagamit ng Facebook account na may pangalang “Recon Vergecon.”

Ang nasabing account ay nag-aalok ng mga serbisyo gaya ng reactivation ng disconnected internet services, bandwidth enhancement para sa mga kasalukuyan nang subscribers, modem support, connection ng bagong subscribers, at speed boosting.

Nakumpirma ng NBI na walang otorisasyon mula internet service provider ang aktibidad ng mga suspek kaya ikinasa ang operasyon.

Ang mga naaresto ay ipinagharap na ng reklamong paglabag sa Cybercrime Prevention Act, Misuse of Devices and System Interference, at Unauthorized Distribution of Network Services. (DDC)