Search and Rescue operations ikinasa para mahanap ang 6 na nawawalang mangingisda sa Cagayan
Nagkasa ng search and rescue operations ang Philippine Coast Guard sa anim (6) na nawawalang mangingisda sa Sta. Ana, Cagayan.
Ayon sa Coast Guard, lulan ng fishing boat “Jobhenz” ang labingtatlong (13) mangingisda nang tumaob ang bangka habang nasa katubigan sakop ng Barangay San Vicente sa kasagsagan ng pananalasa ng Super Typhoon Nando.
Bagaman naka-angkla ang bangka at pansamantalang nag-kanlong at huminto sa paglalayag ay hinampas ito ng malalaking alon at malakas na hangin dahilan para tumaob ang bangka.
Ayon sa Coast Guard, nailigtas ang anim (6) sa mga mangingisda habang kinumpirma naman na mayroong isa (1) ang natagpuang wala nang buhay.
Nag-dispatch na ng High-Speed Response Boat at mga rubber boats para mahanap ang anim pang nawawala. (DDC)
