25 mag-aaral sa isang High School sa QC apektado ng Influenza; 1 ang may sintomas ng HFMD

Agad inaksyuhan ng Quezon City Health Department – Epidemiology and Surveillance Division ang ulat sa Sta. Lucia High School sa District 5 sa Quezon City kaugnay sa suspected case ng Hand, Foot, and Mouth Disease at mga kaso ng Influenza-Like Illness sa paaralan.

Sa inisyal na imbestigasyon ng surveillance team, isang mag-aaral ang nakitaan ng mga sintomas ng HFMD habang 25 mag-aaral din ang nakitaan ng sintomas ng influenza, kagaya ng lagnat, pananakit ng lalamunan, at sipon.

Isinailalim na sa antigen testing ang mga mag-aaral na nakitaan ng sintomas.

Agad ding pinayuhan ang mga estudyanteng may sintomas na manatili muna sa kanilang bahay upang hindi na makahawa pa.

Ipinaliwanag din sa mga guro, mga mag-aaral at school personnel ang mga dapat gawin upang maiwasan ang hawaan ng ganitong sakit.

Sa ngayon ay patuloy na nakikipag-ugnayan ang QC Health Department sa mga guro, at mga magulang ng mga mag-aaral upang ma-monitor ang kanilang kalusugan. (DDC)