Sanggol na ninakaw sa ospital sa Pangasinan, nabawi na
Ligtas na nabawi ng mga otoridad ang isang bagong silang na sanggol na ninakaw sa loob ng OB-Gyne Ward ng Lingayen Dagupan District Hospital noong Linggo, September 14.
Sa press briefing sinabi ni Pangasinan Governor Ramon Guico III na naibalik na ang sanggol sa kaniyang pamilya.
Nabawi ang bata sa pagtutulungan ng Pangasinan Police Provincial Office, Provincial Hospital Management Service, iba’t ibang ahensya ng pamahalaan sa lalawigan, at ng komunidad.
Dahil patuloy pa ang imbestigasyon sa kaso, tumanggi muna ang gobernador at ang pulisya na isapubliko ang mga detalye sa pagkakabawi sa bata.
Una nang sinabi ng Pangasinan police na isang babae na nagpanggap na nurse ang pumasok sa OB-Gyne Ward noong Linggo at saka tinangay ang bagong silang na sanggol. (DDC)
