Phyton, Usa, Iguana at iba pang uri ng hayop ilegal na itinatago sa isang bahay sa Marikina

Nagkasa ng joint police operation ang Northern NCR Maritime Police Station at Department of Environment and Natural Resources laban sa dalawang lalaki na sangkot sa iligal na pag-aari ng mga wildlife species sa Barangay Marikina Heights, Marikina City.

Ang mga suspek na kinilala sa alyas na “Ronaldo” at “Rodel” ay pinaghahanap dahil sa paglabag sa Republic Act No. 9147 o Wildlife Resources Conservation and Protection Act na nagbabawal sa panghuhuli, pangongolekta, at pag-aari ng wildlife species at by-products o bahagi ng mga ito.

Sa bisa ng search warrant na inisyu ng korte sa Marikina City, ikinasa ang operasyon sa bahay na pinagtataguan sa mga hayop.

Narekober sa nasabing compound ang mga sumusunod na protected wildlife:
– isang Ball Python na tinatayang nagkakahalaga ng 20,000 pesos
– isang Albino Burmese Python na nagkakahalaga ng 50,000 pesos
– isang Philippine Deer na nagkakahalaga ng 500,000 pesos
– isang deer antler na nagkakahalaga ng 5,000 pesos
– isang Iguana na nagkakahalaga ng 10,000 pesos
– at dalawang long-tailed macaques na ang halaga ay 30,000 pesos

Sa kabuuan aabot sa nasa 615,000 pesos ang halaga ng nakumpiskang mga hayop.

Dinala ang mga ito sa pangangalaga ng DENR-NCR, habang pinaghahanap pa ang dalawang suspek na hindi nadatnan sa sinalakay ng bahay. (DDC)