CR sa LRT-1 Pedro Gil Station nagagamit ng kawani pero hindi ng mga pasahero; acting secretary ng DOTr nadismaya

Nag-inspeksyon si acting Transportation Secretary Giovanni Lopez sa Pedro Gil station ng LRT-1 at labis itong nadismaya sa lagay ng comfort room na matagal nang panahong hindi nagagamit ng mga pasahero.

Nadismaya si Lopez nang makita ang maruming CR at nagmistulang tambakan na lamang ng mga gamit.

Pero lalong uminit ang ulo ng kalihim nang malamang matagal nang nakasara ang CR at hindi nagagamit ng mga pasahero, pero nagagamit naman ng mga empleyado ng Light Rail Manila Corp.

Ang LRMC ang private operator ng LRT-1 line.

Agad namang inatasan ni Lopez si Light Rail Transit Authority Administrator Hernando Cabrera na abonohan na lamang muna ang pagpapaayos ng CR at i-charge na lamang sa LRMC ang mga magagastos.

Iginiit ng acting secretary na dapat lahat ng CR sa bawat istasyon ng LRT-1 ay nagagamit ng mga komyuter, lalo na ng mga persons with disabilities at senior citizens. (DDC)