Bagong silang na sanggol ninakaw sa ospital sa Lingayen

Patuloy ang ginagawang paghahanap ng mga otoridad sa suspek sa pagnanakaw sa isang sanggol sa loob ng ospital sa Lingayen, Pangasinan.

Ayon kay Pangasinan Police Provincial Office, officer-in-charge, Police Colonel, Arbel Mercullo, hapon ng Linggo, Sept. 15 isang babae na nagpanggap bilang nurse ang ang nakapasok sa OB-Gyne Ward ng Lingayen District Hospital at saka kinuha ang bagong silang na sanggol.

Tiniyak ni Mercullo na ginagawa ang lahat para maaresto ang suspek at maibalik ang sanggol sa kaniyang pamilya.

Nakipag-ugnayan na ang Lingayen Municipal Police Station sa Municipal Social Welfare and Development Office at sa hospital authorities para ma-review ang CCTV footage, background verification, at pagkalap ng iba pang ebidensya.

Umapela din ang pulisya sa publiko na makipagtulungan sa mga otoridad sakaling mayroon silang impormasyon kaugnay sa kinaroroonan ng suspek. (DDC)