Nagtago ng 41 taon, suspek sa murder timbog sa Baguio City

Matapos magtago ng apatnapu’t isang taon natimbog na sa wakas ng mga otoridad ang isang puganteng suspek sa kasong murder.

Ang suspek na si MARIO LUMAGUE ay naaresto ng mga tauhan ng National Bureau of Investigation – Cordillera Administrative Region sa pinagtataguan nito sa Baguio City.

Taong 1986 pa na ng ilabas ng Baguio City Regional Trial Court ang warrant of arrest laban kay Lumague makaraang tumakas ito sa pulisya bago ang nakatakdang hearing sa kaniyang kaso noong November 1984.

Habang nakalalaya ay nakapagtrabaho pa ang suspek bilang taxi driver at ipinagyayabang pa sa mga kapwa niya driver na may kaso siyang murder at nakatakas siya sa mga otoridad.

Nadakip si Lumague sa inuupahan niyang apartment sa lungsod at agad dinala sa korte na nag-isyu ng commitment order para siya ay makulong. (DDC)