4Ps beneficiaries hiniling na paabutin ang cash grant hanggang makapagtapos ng kolehiyo ang kanilang mga anak

Nais ng mga Pantawid Pamilyang Pilipino Program o 4Ps beneficiaries na palawigin hanggang kolehiyo ang suporta ng Department of Social Welfare and Development sa kanilang mga anak.

Ayon kay DSWD Secretary Rex Gatchalian, ang panawagan ay ginawa ng mayorya ng mga beneficiaries mula sa Quirino province sa idinaos na dayalogo sa 4Ps families.

Sa ilalim ng umiiral na 4Ps Law, binibigyan ng conditional education at health grants ang mga batang edad 0 hanggang 18 at pagsapit sa edad na 19, hindi na sila eligible para sa cash grants.

Tiniyak naman ni Gatchalian na ikokonsidera ng ahensya ang pagpapalawig ng programa at imumungkahi niya ito sa mga mambabatas pati na rin kay Pangulong Ferdinand Marcos Jr.

Siniguro din ng kalihim na patuloy ang mga hakbang ng ahensya para matiyak na mapanatiling epektibo ang paghahatid ng kanilang mga programa. (DDC)