Brice Hernandez ililipat sa PNP Custodial Center

Ililipat sa kostodiya ng PNP Custodial Center sa Camp Crame sa Quezon City si dating Bulacan 1st district assistant engineer Brice Hernandez para masiguro ang kaniyang kaligtasan.

Pero ayon kay Senate President Vicente “Tito” Sotto III mananatili ang pag-iral ng “contempt” na ipinataw ng senado kay Hernandez at nasa ilalim pa din siya ng supervision ng Senate Office of the Senate Sergeant-at-Arms (OSAA).

Kahit nasa kostodiya ng senado ay pinayagan ni Sotto ang request ng House of Representatives para sumipot si Hernandez sa pagdinig ng Infrastructure Committee ng Kamara kaugnay sa mga anomalya sa flood control projects.

Pinatawan ng contempt si Hernandez ng Senate blue ribbon committee dahil sa paulit-ulit nitong pagtanggi na sagutin ang mga katanungan kaugnay sa paglalaro niya ng casino.

Matapos idawit sina Senators Jinggoy Estrada at Joel Villanueva sa pagharap niya sa pagdinig ng Kamara, hiniling ni Hernandez na huwag na siyang ibalik sa kostodiya ng senado. (DDC)