Pitong menor de edad na nailigtas sa online sexual abuse, inaayudahan ng Taguig LGU
Nangako si Taguig City Mayor Lani Cayetano na walang tigil nilang isusulong ang kampanya na labanan ang child exploitation sa lungsod kung saan umabot na sa 50 na biktima ang narescue simula 2022.
Pitong menor-de-edad ang na-rescue sa entrapment operation kontra trafficking in person and online sexual abuse and exploitation of children sa Barangay Calzada-Tipas nitong Martes na agad sinuportahan at prinotektahan ng Pamahalaang Lungsod ng Taguig ang mga nasabing victim-survivors.
Ayon sa report, isinagawa ang operasyon dakong alas-9:20 ng gabi nitong Setyembre 3, sa pangunguna ng Philippine National Police National Headquarters kasama ang Women and Children Protection Desk (WCPD)-Taguig.
Ang mga lokal na social workers mula sa City Social Welfare and Development Office (CSWDO) ay nagpunta sa lugar upang bigyang seguridad ang kaligtasan ng mga nasagip na menor-de-edad.Sila ay nagsilbing pansamantalang guardians, nagsaayos ng medico-legal examinations at medical checkups, at nagbigay ng agarang psychosocial intervention. Kaagad na nakipag-ugnayan ang Taguig LGU sa isang child-caring facility kung saan dinaa ang mga batang biktima para sa pangmatagalang rehabilitasyon matapos ang inquest proceedings.
Lumilitaw sa inisyal na imbestigasyon na ang nanay ng mga biktima ang nagrerecord ng mga mahahalay na videos ng mga bata at ibinibenta ito sa online sa mga dayuhang parokyano para sa halagang P2,500 kada transaksiyon. Siya ay iniulat na inaasistehan ng kanyang 19-anyos na babaeng anak na puwersahan din isinadlak ang sariling anak na 3-taong gulang na apo ng naturang suspek.
Naaresto sa kasagsagang ng operasyon ang dalawang suspek na nakakulong ngayon at nahaharap sa patung-patong na mga kaso sa ilalim ng Anti-Trafficking in Persons Act of 2003, Anti-Child Pornography Act of 2009, at Special Protection of Children Against Abuse, Exploitation and Discrimination Act.
Mariing kinundena ni Mayor Lani Cayetano ang nasabing krimen at nangako siyang mananatili ang Taguig sa walang tigil nitong pakikipaglaban kontra pang-aabuso.
“Walang puwang sa ating lungsod ang mga ganitong uri ng pang-aabuso. Hindi natin hahayaang may bata na alipustain, lalo na sa kamay ng mga taong dapat sana’y nagmamahal at nag-aalaga sa kanila. Sa Taguig, buo ang ating paninindigan—ang mga bata ay laging ligtas at laging may kinabukasan.”
Simula nang bumalik sa puwesto si Mayor Lani noong Hunyo 2022, ang Taguig ay aktibong minomonitor at umaasiste sa rescue operations na target ang online sexual abuse o exploitation ng mga bata. Sa partisipasyon ng CSWDO sa 18 rescue operations, tinutulungan nito ang nailigtas na 50 victim-survivors magmula Hunyo 2022 hanggang sa kasalukuyan.
Patuloy ang Taguig social workers na sinasamahan ang mga menor-de-edad sa mga pagdinig sa korte at nagbibigay ng tuluy-tuloy na psychosocial support bilang bahagi ng long-term intervention ng lungsod (Bhelle Gamboa)
