Bilyonaryong si Joseph Sy walang PSA record ang magulang

Walang rekord sa Philippine Statistics Authority ang mga magulang ni Joseph Sy – ang chairman ng Global Ferronickel Holding¬s Inc.

Ayon kay Senator Risa Hontiveros, humingi siya ng mga dokumento sa PSA upang alamin ang tunay na pagkakakilanlan ni Sy na nauna nang hinuli ng Bureau of Immigration dahil sa pagpapanggap na Pinoy.

Lumabas ayon kay Hontiveros na walang record ng birth o death certificate ng sinasabing ina ni Sy na si Aida Samson Cue at amang si Emilio Toledo Sy pati na ang pagpapakasal umano ng dalawa sa Balanga, Bataan noong June 1964.

Natuklasan din ng senadora na 41 years old na si Sy nang iparehistro ang kaniyang birth certificate kaya nakakaduda kung talaga pang tumira ang negosyante sa Pilipinas.

Naniniwala si Hontiveros na si Sy ay ang Chinese citizen na si Chen Zhong Zhen at gumamit lamang ito ng mga pekeng dokumento para palabasin na siya ay Pilipino gaya ng ginawa ni da¬ting Bamban, Tarlac Mayor Alice Guo. (DDC)