Rider na viral sa motorcycle stunt video, ipinatatawag ng LTO

Pinatawan ng suspensyon ng Land Transportation Office ang driver’s license ng rider na nag-viral dahil sa motorcycle stunt nito.

Ayon kay LTO Chief, Assistant Secretary Vigor D. Mendoza II, nakalap ng ahensya ang mga impormasyon sa sangkot na rider kaya naipataw na ang suspensyon sa lisensya nito.

Nag-isyu na din ng show cause order sa rehistradong may-ari ng motorsiklo.

Pinahaharap ang registered owner sa imbestigasyon ng LTO para ipaliwanag din kung bakit walang license plate ang gamit niyang motorsiklo base sa nag-viral na video.

Sa viral video, ang rider na sakay ng Honda motorcycle ay nakitang gumagawa ng stunts, nagsasayaw at iba pang reckless acts habang nasa kalsada. (DDC)