12 sasakyan ng mga Discaya bantay-sarado na ng BOC

Accounted for na ang lahat ng labingdalawang (12) sasakyan ng mga Discaya na subject ng search warrant ng korte, magsasagawa na ng verification ang Bureau of Customs sa importation records ng mga ito.

Ayon kay BOC Commissioner Ariel Nepomuceno, tutukuyin ng ahensya kung nakasunod ba sa customs law sa ginawang pagbili ng mga magagarang sasakyan ng contractor na si Sarah Discaya.

Kung makikitaan ng discrepancies, isasampa ang kaso sa ilalim ng Customs Modernization and Tariff Act.

Martes (Sept. 2) ng gabi nang kumpirmahin ng BOC na isinuko na sa ahensya ang pito sa mga mamahaling sasakyan na pag-aari ng contractor na si Discaya.

Ayon sa BOC, matapos mawala sa garahe ang karamihan sa mga luxury vehicles ng mga Discaya ay naisuko na ito sa ahensya.

Sa ngayon ay binabantayan na ng mga tauhan ng BOC sa parking area ng St. Gerrard Construction General Contractor and Development Corp. sa Pasig City ang mga sasakyan na kinabibilangan ng mga sumusunod:

Rolls Royce Cullinan 2023
Bentley Bentayga
Mercedes Benz G-Class (Brabus G-Wagon)
Mercedes AMG G 63 SUV 2022
Toyota Tundra 2022
Toyota Sequoia
Cadillac Escalade ESV 2021

Kasama sa sinelyuhan ang Toyota LC300 at Maserati Levante Modena 2022 na nadatnan ng BOC nang salakayin ang headquarters ng mga Discaya umaga ng Martes.

Ang tatlo pang mamahaling sasakyan ng mga Discaya na kinabibilangan ng Mercedes Benz G 500 SUV 2019, GMC Yukon Denali SUV 2022 at Lincoln Navigator L 2024 ay kasalukuyang nasa service centers para sumailalim sa repair pero nagpahayag na ang mga Discaya ng kahandaang isuko din ang mga ito sa BOC.

Sinabi ni Nepomuceno na ang mga sasakyan ay sasailalim sa round-the-clock na pagbabantay ng BOC at mga tauhan ng Philippine Coast Guard. (DDC)