3 timbog sa pagbebenta ng nakaw na frozen meat sa QC

Arestado sa ikinasang entrapment operation ang tatlong katao dahil sa pagbebenta ng nakaw na frozen meat sa Quezon City.

Ikinasa ng National Bureau of Investigation – Organized and Transnational Crime Division ang operasyon na nagresulta sa pagkakadakip ng mga suspek na sina Rhea S. Rivera, Mia Lyn Cunanan, at Rodel C. Deniega dahil sa paglabag sa Presidential Decree No. 1612 o Anti-Fencing Law of 1979 in relation to Republic Act No. 10175 o Cybercrime Prevention Act of 2012.

Unang nakatanggap ng reklamo ang NBI dahil sa pagkwala ng isang container na puno ng imported frozen beef shanks na tinatayang nagkakahalaga ng 5 million pesos hanggang 6.9 million pesos.

Nagawang ma-trace ng complainant na ibinebenta online ang nawawalang mga karne sa pamamagitan ng social media platform gamit ang account name na “Kaye’s Imported Cold Cuts” sa BMR Frozen Meat Products Trading sa Cubao, Quezon City.

Kasama ang NBI pinuntahan ng complainant ang BMR at nag-order ng 30 boxes ng Beef Forequarter Shin Shanks at 7 boxes ng Hind Shanks at pagkatapos maiabot ang marked money ay agad dinakip ang mga suspek.

Nakumpiska din sa lugar ang 37 boxes ng meat products. (DDC)