Masinop na paggugol sa buwis ng taumbayan panawagan ni Mayor Olivarez
Muling nanindigan si Paran̈aque City Mayor “Kuya” Edwin L. Olivarez sa pangako ng kasalukuyang administrasyon sa agarang paghahatid ng lokal na pamahalaan ng mga serbisyo sa mga residente sa pamamagitan ng General Services Office (GSO).
Nanawagan si Olivarez sa GSO na manatiling masinop sa paggastos dahil pinapahalagahan ng Paran̈aque LGU ang mga buwis mula sa pinaghihirapang kinikita ng mamamayan nito.
Idinagdag ng alkalde na ang alokasyon ng budget ng lungsod ay marapat ang matalinong paggugol dahil patuloy ang lokal na pamahalaan sa pamamagitan ng GSO na itinataguyod ang accountability at transparency sa procurement process o proseso ng pagbili.
Pinuri ni Olivarez ang GSO sa kanyang mahusay at napapanahong paghahatid bg mga serbisyo at pagbigay-seguridad sa mga pag-aari ng Paran̈aque sa ilalim ng liderato ni Atty. Arvin Tapia kasama ang iba pang sangay ng lokal na pamahalaan lalo na ang nakalipas na sama ng panahon nitong buwan ng Hulyo.
“Napaka-importante po ‘yung timing, importante-importante [po] ‘yung pangangailangan maibigay po ng ating GSO sa lahat ng opisina, sa lahat ng (service) department dito sa ating siyudad,” sabi ni Mayor Olivarez. (Bhelle Gamboa)
