Seminarista sa Eastern Samar nawala sa katinuan; Seminaryo tinangkang sunugin, sinaktan ang mga kapwa seminarista
Sugatan ang ilang seminarista habang nasunog ang bahagi ng isang seminaryo sa Eastern Samar makarang mawala umano sa katinuan ang isa nilang seminarista.
Sa pahayag ng Nativity of Our lady College Seminary Formators sa Borongan City, madaling araw ng Miyerkules, August 27 nang magpakita ng senyales ng mental health crisis ang naturang seminarista.
Tinangka umano nitong sunugin ang ilang bahagi ng gusali, at ang mga kapwa niya seminarista ay kaniyang hinarass at sinaktan.
Nagpapagaling ngayon sa Eastern Samar Provincial Hospital ang hindi tinukoy na bilang ng mga seminarista.
Ayon sa pahayag ng seminaryo, agad din silang nakipag-ugnayan sa pulisya para humingi ng tulong.
Ang mga seminarians agad isinailalim sa psychiatric intervention at psycho-social debriefing matapos ang insidente, habang ang seminarista na nakaranas ng mental health crisis ay dinala sa psychiatric facility. (DDC)
