9 timbog sa pekeng sapatos sa Pasay
Inaresto ng mga tauhan ng Criminal Investigation and Detection Group ang siyam na katao sa sinalakay na mga tindahan ng sapatos sa Cartimar Shopping Center, Pasay City.
Isinagawa ang operasyon kasunod ng reklamo ng iba’t ibang brand ng mga sapatos laban sa mga pekeng ibinebenta sa Cartimar na malinaw na paglabag sa Republic Act No. 8293 o Intellectual Property Code of the Philippines.
Umabot sa halos 300 pares ng pekeng Crocs, Vans at Puma ang nakumpiska na tinatayang aabot sa P1,735,000 ang halaga.
Ang mga inarestong suspek ay sinampahan na ng kaso dahil sa hindi otorisadong paggamit ng rehistradong trademark na maaaring magdulot ng kalituhan o panloloko sa consumers. (DDC)
