Halos 2,000 Barn Spiders nakumpiska sa GenSan Airport

Nakumpiska ng wildlife team monitoring unit ng Community Environment and Natural Resources Office o CENRO sa General Santos City halos dalawang libong piraso ng Barn Spiders na dala ng isang pasahero sa General Santos City International Airport.

Ayon sa CENRO-GenSan, ang mga gagamba ay nakalagay sa isang (1) kahon na naglalaman ng dalawampu’t tatlong (23) karton at nakabalot ng plastic cellophane.

Nakatakda sanang isakay ang mga ito sa eroplano patungong Iloilo City.

Ayon sa CENRO, kinumpiska ang mga gagamba dahil sa paglabag sa Republic Act 9147 o Wildlife Resources Conservation and Protection Act na nagbabawal sa ilegal na pangangalap, pagbebenta, at transportasyon ng wildlife nang walang kaukulang permit.

Ang mga nasabat na Barn Spiders ay nasa kustodiya ng CENRO GenSan at nakatakdang ibalik sa kanilang natural na tirahan sa lalong madaling panahon. (DDC)