Torre lumagpas sa kapangyarihan nang sibakin noon ang kaniyang second-in-command ayon kay Sen. Lacson

Lumagpas sa kaniyang kapangyarihan ang nasibak na si Gen. Nicolas Torre III nang sibakin nito sa pwesto ang kaniyang second-in-command na si P/Lt. Gen. Jose Melencio Nartatez Jr.

Ito ang nakikitang dahilan ni Senator Panfilo Lacson kung bakit inalis ng Malakanyang sa pwesto si Torre.

Ayon kay Lacson ang pagtatalaga at pagsibak sa mga miyembro ng PNP Command Group gaya ng Deputy for Administration, Deputy for Operations, at Chief, Directorial Staff ay dapat mayroong clearance ng pangulo ng bansa o ng ex-officio Chairman ng National Police Commission at ng kalihim ng Department of the Interior and Local Government.

Sinabi ni Lacson na noong panahon niya bilang PNP chief mula 1999 hanggang 2001 binigyan siya ng “blanket authority” ni dating Pangulong Joseph Estrada na pamunuan at i-manage ang pambansang pulisya pero hindi niya ginamit ang “absolute authority” sa pagtatalaga o pagsibak sa mga miyembro ng Command Group.

Ayon sa senador, “sole prerogative” ni Pangulong Ferdinand Marcos Jr. ang pagsibak kay Torre sa pwesto.

Ang mahalaga ngayon ani Lacson ay ang pagkakaroon ng smooth transition at transfer of command para hindi maantala ang misyon ng PNP at magpatuloy ang pagpapanatili ng peace and order sa bansa. (DDC)