Pagkuha ng medical assistance sa PCSO kasing hirap ng manalo sa lotto
“Parang ginagawang lotto”!
Ganito inilarawan ni Akbayan Partylist Representative Perci Cendaña ang proseso para makapag-avail sa Medical Assistance Program ng Philippine Charity Sweepstakes Office.
Kung gaano ka-imposible ang manalo sa Lotto, tila ganoon din ka-imposibleng makakuha ng tulong-medikal sa PCSO.
Sa deliberasyon ng budget ng PCSO, pinuna ni Cendaña ang palaging pag-crash ng site kung saan inihahain ang aplikasyon para sa medical assistance gayundin ang napakabilis na maabot ang daily limit para sa aplikasyon.
Kaugnay nito ay hinikayat ng mambabatas ang PCSO na ayusin ang mga problema sa kanilang portal para hindi na maging dagdag pahirap pa sa mga may sakit na nangangailangan ng tulong.
Hiniling din ni Cendaña ang ahensya ng itaas pa ang daily limit para sa online applications at mas padaliin ang access dahil hindi naman lahat ng Pinoy ay mayroong maayos na internet service. (DDC)
