Anti-drug drive pinaigting ng SPD, higit P3M halaga ng droga nasabat sa Parañaque City
Isang malaking tagumpay ng Southern Police District (SPD) ang maigting nitong kampanya kontra ilegal na droga matapos maaresto ang limang suspek at nakumpiska ang mahigit ₱3 million na halaga ng ilegal na droga sa ikinasang buy-bust operation sa Barangay Tambo, Parañaque City.
Ayon sa report nagsagawa ng operasyon ang mga operatiba ng SPD mula sa Station Drug Enforcement Unit sa pamumuno ni Cpt Luis Gazzingan Jr. sa ilalim ng superbisyon ni Paran̈aque CPS Officer-in- Charge, Col. Nicolas Pin̈on na nagresulta ng pagkaaresto ng mga suspek na kinilalang sina alyas “Christian,” 28-anyos, at alyas “Symon,” 29-anyos, kapwa High-Value Individuals (HVI),alyas “Renmer,” 26-anyos, alyas “Jackylyn,” 21-anyos, at alyas “Christine,” 26-anyos, pawang natukoy na Street-Level Individuals (SLI).
Nakumpiska ng SPD operatives ang tinatayang 200 na gramo ng hinihinalang Ketamine na nagkakahalaga ng ₱1,100,000.00; 1 kilo ng umano’y Marijuana Kush na may halagang ₱700,000.00; at 500 na gramo ng dried marijuana leaves na aabot sa halagang ₱60,000.00.
Narekober din ng otoridad ang 791 na pirasong ” Ecstasy” tablets na nagkakahalaga ng ₱1,344,700.00.
Bukod dito nakakuha din ng pakete ng high-grade marijuana na nagkakahalaga ng ₱16,800.00; ilang packs ng Ecstasy tablets na mayroong iba’t ibang kulay; buy-bust money; weighing scale; storage box, black bag; at cellular phone na ginamit sa transaksiyon.
Inihahanda ng otoridad ang pagsasampa ng kaukulang kaso laban sa limang suspek sa Parañaque City Prosecutor’s Office.
Pinuri naman ni NCRPO Regional Director MGen Anthony A. Aberin ang aksyon ng SPD sa pagsagawa ng operasyon na patunay ng malakas na hakbang nito kontra aktibidad ng ilegal na droga sa naturang lungsod.
Samantala pinuri rin ni SPD Acting District Director BGen Randy Y. Arceo ang operating team sa matagumpay na operasyon na sumasalamin sa direktiba ni PNP Chief General Nicolas Torre III na paigtingin ang anti-illegal drugs campaign sa pamamagitan ng pagtugon na serbisyo publiko, pagkakaisa, at moralidad sa hanay ng pulisya, at pananagutan sa modernong polisiya. (Bhelle Gamboa)
