Kidnap victim narescue ng SPD, Chinese national arestado sa Parañaque City
Narescue ng Southern Police District (SPD) ang isang Chinese national na biktima ng pagdukot at nagresulta ng pagkaaresto ng isang dayuhang suspek sa ikinasang anti-crime operation sa condominium sa Pacific Drive, Barangay Don Galo, Parañaque City.
Ang biktima na si alyas Wu, 31-anyos, ay natagpuang duguan at mayroong tama ng bala sa kaliwang paa matapos umano siyang ikulong sa loob ng condominium unit. Kaagad siyang isinugod sa Premiere Medical Center upang malapatan ng lunas.
Batay sa CCTV footage ,makikita ang pagpasok ni alyas Wu sa gusali kasama ang dalawang lalaki at kanyang nobyang si alyas Yan. Ilang oras ang nakalipas, nakita ang biktima na sugatan sa lobby bago iskortan para sa kinakailangang alagang medikal.
Ininspeksiyon ng mga imbestigador ng Parañaque Police Detective Unit at Sto. Niño Sub-Station sa ilalim ng liderato ni Paran̈aque CPS Officer-in-Charge ng Col. Nicolas Pin̈on, ang pinangyarihan ng insidente at narekober ang hinihinalang shabu, drug paraphernalia, at Alien Certificate of Registration ng isang alyas Cui, 41-anyos, na kasalukuyang nakakalaya pa kasama a g tatlong iba pang suspek.
Sa follow-up operations sa isa pang condominium sa Brgy Don Galo, nadakip ng otoridad ang suspek na si alyas Zhao, 36-anyos, isa rin Chinese national. Nasamsam sa loob ng yunit ang maraming pakete na naglalaman ng umano’y shabu, assorted tablets at powder substances, dried marijuana leaves, drug paraphernalia, 131 na iba’t ibang uri ng bala ng baril at anim na 9mm magazines.
Positibong kinilala ng biktima si alyas Zhao na isa sa mga kumidnap sa kanya.
Inihahanda ng otoridad ang pagsasampa ng kasong Kidnapping, Comprehensive Firearms and Ammunition Regulation Act, at Comprehensive Dangerous Drugs Act of 2002 laban kay alyas Zhao.
“This successful rescue and arrest reflect our firm commitment to protect both Filipinos and foreign nationals from organized crimes. The Southern Police District will relentlessly pursue those who spread violence and illegal activities in our communities,” pahayag ni SPD Acting District Director, BGen Randy Y. Aceo.
Aniya bilang tugon ng SPD sa mahalagang direktiba ng Philippie National Police,patuloy ang maigting nilang operasyon laban sa organized crime groups, partikular ang mga dayuhang sangkot sa kriminal na aktibidad.
Tinutugis ng otoridad si alyas Cui at iba pang suspek kasabay ng pagtiyak sa publiko ng mas maigting ang isinasagawang follow-up operations. (Bhelle Gamboa)
