Idaraos na WorldSKills ASEAN Manila 2025 sa Pasay City posibleng makaapekto sa daloy ng traffic – MMDA

Inabisuhan ng Metropolitan Manila Development Authority ang mga motorista sa posibleng epekto sa daloy ng trapiko ng idaraos na 14th WorldSkills ASEAN Manila 2025.

Ang opening ceremony sa aktibidad na pangungunahan ng Technical Education and Skills Development Authority o TESDA ay isasagawa sa August 25 sa Marriott Grand Ballroom.

Habang ang main competition dates ay mula August 26 hanggang 28 sa World Trade Center at ang closing ceremony ay gaganapin naman sa August 30 sa SMX Convention Center Manila.

Inabisuhan ng MMDA ang mga motorista na dahil sa mahigit isang libong attendees na kinabibilangan ng mga participants, estudyante, guro, mga kinatawan mula sa edukasyon at government sector ay aasahan ang pagsisikip sa daloy ng traffic sa palibot ng nabanggit na mga venue.

Magtalaga ang MMDA ng hindi bababa sa walumpu’t limang (85) tauhan para ipatupad ang traffic management measures at emergency preparedness sa mga pangunahing lansangan sa Metro Manila mula sa paliparan hanggang hotels, competition venues, at iba pang lugar. (DDC)