Mas mabilis na komunikasyon at koordinasyon aasahan sa mga barangay sa Las Piñas City
Pinangunahan ni Mayor April Aguilar ang turnover ng 100 handheld na radyo mula sa Las Piñas Disaster Risk Reduction and Management Office (DRRMO) para sa 20 barangay sa lungsod.
Ang bawat barangay ay nakatanggap ng tig-5 na radyo upang mas mapabilis ang komunikasyon at koordinasyon sa panahon ng emergency.
Layunin nitong paigtingin ang kahandaan at mabilis na pagtugon ng mga barangay sa mga sakuna, aksidente, at iba pang pangyayari na nangangailangan ng agarang aksyon.
Kasabay ng turnover, nilagdaan rin ang Deed of Donation bilang opisyal na patunay ng suporta mula sa Pamahalaang Lungsod.
Sa pangunguna ni Mayor April ay patuloy na sinisikap ng Las Piñas na gawing ligtas at maayos ang bawat barangay sa pamamagitan ng mahusay na komunikasyon at pagtutulungan. (Bhelle Gamboa)
