Warships ng US Navy nasa Bajo de Masinloc

Ilang araw matapos ang insidente ng banggaan ng dalawang barko ng China, dalawang Navy warships ng US ang namataang naka-deploy sa Panatag Shoal.

Kinumpirma ng Philippine Coast Guard namataan ang USS Higgins at USS Cincinnati
sa 30 nautical miles mula sa Panatag Shoal sa kasagsagan ng Caravan aircraft ng PCG na nagsasagawa ng Maritime Domaine Awareness o MDA sa Bajo de Masinloc.

Sinabi ni PCG Commodore Jay Tarriela, isinasagawa ng dalawang US Navy ships ang kanilang navigational rights sa West Philippine Sea sa ilalim ng international law.

Habang nananatili sa Bajo de Masinloc, sinabi ni Tarriela na isang PLA Navy warship ng China ang bumuntot sa dalawang US Navy vessels.

Isinasagawa ng Philippine Coast Guard ang MDA para imonitor at tiyaking ligtas ang mga mangingisdang Pinoy sa Bajo de Masinloc. (DDC)