10 barko ng China namataan sa Bajo de Masinloc; Chinese Jet Fighter nagsagawa ng dangerous maneuvers sa PCG Aircraft

Namataan malapit sa Bajo de Masinloc ang apat (4) na Chinese Coast Guard ships at anim (6) na Chinese Maritime Militia boats ngayong araw ng Miyerkules August 13 – ilang araw matapos magbanggaan ang dalawang Chinese vessel sa lugar.

Sinabi ni Coast Guard spokesperson for the West Philippine Sea Commodore Jay Tarriela, ang barko ng CCG na napinsala matapos makabanggaan ng People’s Liberation Army navy ship ay wala na sa bisinidad ng Bajo de Masinloc.

Ani Tarriela, isang J-15 fighter aircraft ng China ang delikado ding nilapitan ang PCG Caravan aircraft at patuloy silang sinundan nito sa loob ng mahigit 20-minuto na may distansya lamang na 500 feet.

Nagsagawa pa ng dangerous maneuvers sa PCG aircraft ang eroplano ng China na ang distansya ay nasa 200 feet lamang.

Limang beses ding niradyuhan ng PLA Navy warships ang PCG Caravan aircraft.

Sa kabila nito sinabi ni Tarriela na patuloy na isusulong ng PCG ang maritime rights sa teritoryo at titiyakin ang kaligtasan ng mga mangingisda doon. (DDC)