P1.7M na halaga ng shabu nakumpiska, 4 HVIs nasakote sa DDEU-SPD buy-bust
Nasa kustodiya ngayon ng pulisya ang apat na High-Value Individuals (HVIs) matapos makumpiska ng mga operatiba ng District Drug Enforcement Unit ng Southern Police District (DDEU-SPD) ang P1,700,000.00 na halaga ng umano’y shabu sa ikinasang intelligence-driven buy-bust operation sa Barangay South Signal, Taguig City.
Ang mga suspek ay kinilalang sina alyas “Roko,” 43-anyos; alilyas “Daud,” 49-anyos; alyas “Nasrudin,” 41-anyos; at alyas “Ana,” 21-anyos.
Pinangunahan ni Maj. Cecilio Tomas Jr., hepe ng DDEU-SPD, ang isinagawang operasyon kasama ang District Intelligence Division at mga tauhan ng Sub-Station 6 ng Taguig City Police Station sa ilalim ng susperbisyon ni Col. Robert Baesa, Acting Deputy District Director for Operations.
Nakumpiska ang tinatayang 250 na gramo ng hinihinalang shabu, buy-bust money, mobile phone, at pulang Mazda 2 (NED 9518).
Ang mga narekober na ebidensiya ay tinurn-over sa SPD Forensic Unit upang suriin habang inihahanda ng otoridad ang pagsasampa ng kasong paglabag sa Comprehensive Dangerous Drugs Act of 2002 laban sa mga suspek sa Taguig City Prosecutor’s Office.
PBGEN RANDY Y ARCEO, Acting District Director of SPD, lauded the operation’s success.
“This operation reflects SPD’s firm resolve to dismantle illegal drug networks in our communities. We will continue to sharpen our intelligence and operational capabilities to ensure public safety,” pahayag ni SPD Acting District Director BGen Randy Y. Arceo.
Binigyang-diin naman ni National Capital Region Police Office (NCRPO) Regional Director MGen Anrhony A. Aberin ang matagumpay na operasyon na parte sa maigting at pagpapanatili ng kampanya kontra ilegal na droga sa buong Metro Manila.
“Ang matagumpay na pagdakip sa mga bagong nakilalang High-Value Individuals (HVI) ay isang malinaw na patunay ng walang humpay na kampanya ng NCRPO laban sa iligal na droga. Binabati ko ang dedikasyon at sipag ng ating mga kapulisan sa pagtutok sa layuning ito. Patuloy at matatag ang NCRPO sa misyon nitong protektahan ang buhay, ipatupad ang batas, at tiyakin ang kaligtasan at kalusugan ng bawat komunidad sa Metro Manila,” ayon kay MGen Aberin. (Bhelle Gamboa)
