DepEd kinondena ang pananambang sa principal sa Cotabato

Kinondena ng Department of Education-Schools Division of Cotabato ang pananambang sa isang school principal ng Agriculture Elementary School sa Midsayap North Cotabato.

Ayon sa DepEd, sugatan ang principal na si Arlyn D. Alcebar, 54-anyos makaraang tambangan ng riding in tandem habang papasok sa gate mismo ng paaralan umaga ng Martes, August 12.

Ginagamot ngayon sa ospital ang biktima at nasa maayos nang kalagayan.

Nanawagan si Cotabato Schools Division Superintendent Romelito Flores sa Philippine National Police at Armed Forces of the Philippines na agad imbestigahan ang insidente, tukuyin at arestuhin ang mga nasa likod ng pananambang

Tiniyak din ni Flores ang suporta ng Schools Division ng Cotabato sa biktima, kaniyang pamilya, at sa buong school community. (DDC)