2 tauhan ni Lino Cayetano kinasuhan sa Comelec dahil sa paglabag sa election laws

Dalawang malalapit na tauhan ng natalong kongresista ng District 1 ng Taguig City na si Lino Cayetano, ang kinasuhan sa Commission on Elections (COMELEC) dahil umano sa paglabag sa election laws nang magpost ng magkaparehong propaganda material sa social media ilang oras bago ang halalan nitong Mayo 12, 2025.

Sa reklamong inihain sa COMELEC Law Department nitong Agosto 6, tinukoy ang mga respondents na sina Raymond “Mon” Salve, miyembro ng close-in security team ni Lino, at Maryruth Roven “Beng” Maximo, dating SK Federation President at matagal ng tagasuporta ni Lino.

Ayon sa affidavit, noong Mayo 12—araw ng eleksyon—sabay umanong nag-post ang dalawa sa kanilang Facebook pages ng mga mensahe ng pangangampanya para kay Lino:

“Hindi disqualified at nasa balota. #LabanLino”

“Independiente.

Walang Makinarya.

Walang Padrino.

Pero nandito siya, lumalaban para sa karaniwang tao.”

“To all my friends in District 1 – Taguig and Pateros — choose a leader who delivers. Direk Lino has a strong track record, a clear platform, and real experience, especially during the pandemic. Proven leadership when it mattered most!”

“Vote Direk Lino Cayetano for Congressman of Taguig District 1 and Pateros.”

Ayon sa complaint-affidavit, lumabag umano sina Salve at Maximo sa Section 5 ng Republic Act No. 7166, kaugnay ng Fair Election Act (RA 9006) at mga COMELEC Resolution Nos. 10999 at 11086, kaya sila ay kinasuhan ng paglabag sa election laws. Mahigpit na ipinagbabawal ng mga regulasyong ito ang anumang uri ng partisanong aktibidad pampulitika—kabilang ang mga post sa social media—tuwing Mayo 11 at 12, na tinatawag na “silent period.”

Binigyang-diin sa reklamo na pasok umano sa depinisyon ng “online campaigning” ang ginawa ng dalawa, na kinabibilangan ng mga text, larawan, o kombinasyon ng mga ito na layong impluwensyahan ang pagpili ng mga botante. Kabilang din sa kanilang materyales ang pangalan at numero ni Lino. (Bhelle Gamboa)