Viral post ng netizen na namatayan ng tatay sa East Avenue Medical Center, iniimbestigahan na

Tiniyak ng East Avenue Medical Center na ginagawa nito ang lahat ng hakbang para mapabuti pa ang serbisyo sa kanilang mga pasyente.

Ginawa ng pagamutan ang pahayag matapos ang viral post sa social media ng isang netizen na nagkwentong nasawi sa nasabing ospital ang kaniyang ama.

Ayon sa post, ang babata ng mga doktor sa East Ave, mahirap hagilapin at walang sistema ang pagamutan.

Sa pahayag sinabi ng management ng pagamutan na nakikiramay ito sa pamilya ng nasawing pasyente.

Siniguro din ng East Avenue na iniimbestigahan na ang naging karanasan ng pasyente sa pagamutan at ng pamilya nito at tiniyak na bukas ang ospital sa pakikipagdayalogo.

Sa huli sinabi ng pamunuan ng ospital na magpapatuloy ng kanilang pagseserbisyo sa mga nangangailangan at pangunahing prayoridad nito ang kalagayan ng kanilang mga pasyente. (DDC)