China iginiit na naitaboy nila ang maraming barko ng Pinas

Sinabi ng China Coast Guard na naitaboy nito ang maraming barko ng Philippine Coast Guard at iba pang public service vessels na nasa territorial waters ng Huangyan Dao.

Sa statement ni CCG spokesperson Gan Yu, pinilit umano ng mga barko ng Pilipinas na pumasok sa South China Sea at ang idinadahilan ay maghahatid sila ng suplay sa mga mangingisda doon.

Sinabi ni Gan Yu na ilang ulit umano na binalewala ng PCG ang mga warning ng Coast Guard ng China kaya nagsagawa na sila ng tracking, monitoring at blocking para maitaboy ang mga barko ng Pilipinas.

Iginiit ni Gan na lahat ng aksyon ng kanilang mga barko ay propesyonal at lehitimo at patuloy umano nilang igigiit ang karapatan sa naturang katubigan. (DDC)