Atin Ito Coalition sa China: Dasurb! Ang bilis ng Karma!

Deserve, ang bilis ng karma!

Ito ang pahayag ni Atin Ito Coalition Co-Convenor at Akbayan President Rafaela David, matapos magkabanggaan ang dalawang barko ng China habang hinahabol ang mga barko ng Pilipinas sa Bajo de Masinloc.

Ang nangyari ayon kay David ay patunay na walang lugar sa bansa ang mga nagsisiga-sigaan gaya ng China.

Ilang beses din aniyang nalagay sa peligro ang buhay ng mga sundalo at mangingisda sa West Philippine Sea at ngayon ay buhay na mismo ng kanilang mga tauhan ang nalagay sa peligro.

Pinuri naman ni David ang mga tropa ng bansa na patuloy na nagtatanggol sa soberanya ng bansa.

Ayon pa kay David, sa kabila ng ginawa ng China ay inalok pa ng tulong ng Philippine Coast Guard ang mga crew ng napinsalang Chinese Vessel.

Labis na napinsala ang unahang bahagi ng China Coast Guard na may vessel number 3104 dahil sa pagkakabangga dito ng People’s Liberation Army Navy ship number 164.

Nangyari ito nang magawang iwasan ng BRP Isulan ang mga barko ng China sa patuloy na paghabol at tangkang pagdikit sa kanila.