DND sinigurong hindi tatalikod sa misyon na protektahan ang teritoryo ng bansa

Tiniyak ng Department of Defense na hindi ito tatalikod sa misyon na protektahan ang bansa at patuloy na ipagtanggol ng soberanya nito.

Pahayag ito ni Defense Secretary Gilberto Teodoro matapos na palagan ni Pangulong Ferdinand Marcos Jr. ang pahayag ng Chinese Foreign Ministry na nagsasabing hindi raw dapat makialam ang Pilipinas sa tensyon sa pagitan ng China at Taiwan.

Ayon kay Teodoro, malinaw ng posisyon ni Pangulong Marcos sa West Philippine Sea.

Gaya ng sinabi ng pangulo, hindi aniya naghahanap ng gulo ang mga tropa ng bansa sa halip ay ginagawa lamang nito ang lahat para maprotektahan ng soberanya at karapatan ng Pilipinas sa teritoryo nito.

Ito ayon kay Teodoro ay hindi paghahamon kundi tungkulin ng bawat mamamayang Pilipino.

Sinabi ng kalihim na bagaman ang hangarin ng pangulo ay mapanatiling payapa ang bansa, hindi naman maaaring isantabi lamang ang mga ginagawa ng China.

Kailangan ayon kay Teodoro na ipagtanggol ang likas na karapatan na maging isang malaya, mapayapa at progresibong bansa. (DDC)