Mga suspek na tumangay sa mga alahas ng isang Chinese sa BGC tinutugis ng pulisya

Kinumpirma ng Taguig City Police na isang Chinese National ang nabiktima ng mga magnanakaw at natangayan ng mahigit P1.1 million na halaga ng alahas sa BGC, Taguig.

Ayon sa Taguig City Police, pinaghahanap nila ngayon ang apat na motorcycle-riding suspects na bumiktima sa isang 30-anyos na Chinese national sa bahagi ng Forbes Town Road, 26th Street sa BGC noong August 8, 2025.

Tinangay ng mga suspek ang isang Rolex wristwatch na nagkakahalaga ng 1 million pesos at Tiffany silver necklace na nagkakahalaga naman ng 164,000 pesos at saka mabilis na tumakas.

Binalaan naman ng Taguig City Police ang mga pawnshops, jewelry buyers, at ang publiko sa pagbili o pagtanggap ng nasabing mga alahas dahil maituturing itong paglabag sa Anti-Fencing Law.

Kung mayroong magtatangkang magbenta ng ganitong items ay dapat ding agad i-report sa pulisya. (DDC)