Bilibid lumuwag ng 22.4 percent; 300 pang PDLs inilipat sa Occidental Mindoro
Kinumpirma ng Bureau of Corrections (BuCor) na bumaba ng 22.4% ang congestion rate sa New Bilibid Prison sa Muntinlupa City mula sa 313 na porsiyento noong 2022 hanggang 243 na porsiyento ngayong taon 2025.
Sa midterm accomplishment report ni BuCor Director General Gregorio Pio P. Catapang Jr., kay Justice Secretary Crispin Remulla, ibinunyag nito na naging posible ito sa pamamagitan ng konstruksiyon ng mga bagong pasillidad at paglilipat ng 11,601 na persons deprived of liberty (PDLs) mula sa NBP patungong ibang operating prison and penal farms.
Iniulat din ni Catapang na magmula Hunyo 2022 hanggang Hunyo 2025, nasa sa kabuuang 23,629 PDLs ang pinalaya ng BuCor na lagpas sa unang tatlong taon sa panahon ng nakalipas na administrasyon na umabot sa 41.35 % at nalagpasan din nito ang accomplishment ng nakaraang administrasyon sa mahigit anim na taon ng kanilang termino.
Sinabi pa ng BuCor Chief na nakamit ang tagumpay na ito dahil sa mahusay na Management Screening and Evaluation Committee (MSEC), epektibong implementasyon ng Good Conduct Time Allowance (GCTA), at pagpapalawak ng access sa parole at executive clemency.
Bagama’t mayroong mga bagong dormitories aniya na ipinapatayo upang pataasin ang kapasidad ng PDLs sa 3,000 beds sa Iwahig, Sablayan, Davao Prison and Penal Farms at Leyte Regional Prison, kailangan ng Bucor ang 32 pang dormitoryo na nagkakahalaga ng P14.6 billion upang pangkalahatang tugunan ang backlog.
“We are very fortunate to be given P6 billion as per directive of the the President for the construction of eight dormitories including the supermax facility in Sablayan,” dagdag ni Catapang.
Para sa transpormasyon tungo sa nauugnay, sustenable at respetadong Bucor, binanggit ni Catapang ang pagpapaunlad sa lupa at tubig ng ahensiya upang lumago ang ekonomiya at alagaan ang positibong hatid sa lipunan ng master planning sa Iwahig Prison and Penal Farms na gawing isang mega economic zone na gagawin din sa Sablayan sa Occidental Mindoro at San Ramon Prion and Penal Farms sa Zamboanga.
Dahil sa pagpapaganda ng seguridad, matagumpay na nakumpiska ng BuCor ang 139,738 na mga ipinagbabawal na items, na bahagi rin sa pagganda ng kaligtasan ng officers ng ahensiya at PDLs. Pinalakas din ng BuCor ang kanyang digital services kabilang ang E-Dalaw, E-Burol, at E-Hearing, upang tiyaking mapananatili ang koneksiyon ng PDLs sa kanyang pamilya ar patuloy ang access sa hustisya. Sa datos umabot sa 44,988 digital services ang naitala patunay sa pangako ng BuCor na gawing morderno ang komunikasyon at mga serbisyo; at 5,505 ang nabuwag o sinirang kubol.
Kinakitaan din ng mahalagang pamumuhanan sa human resources kung saan nabigyan ng empleyo ang 4,004 na bagong personnel at 10,244 na staff ang sumasailalim sa specialized education at training upang mapanatili nito ang modernong correctional practices. Bahagi naman ng mahigpit na pananagutan sa pagpapanatili ng kaayusan at integridad, nasa 157 personnel ang dinismis o sinuspinde ng walang bayad dahil sa misconduct, na nagbigay-diin sa zero-tolerance policy ng BuCor para sa masasamang asal.
Samantala nasa 300 pang PDLs mula sa NBP ang inilipat at ligtas na nakarating sa Sablayan Prison and Penal Farm sa Occidental Mindoro ngayong Miyerkules, Agosto 6.
Iniskortan sila ng 100 Corrections Officers na binubuo ng BuCor SWAT, NBP Escort Group at Medical personnel kung saan dakong alas-6:30 ng gabi umalis sa NBP ang naturang PDLs patungong Sablayan. (Bhelle Gamboa)
