MRT-3 may Libreng Sakay tuwing Miyerkules sa buong Agosto para sa mga pasaherong may National ID

Magbibigay ng Libreng Sakay ang MRT-3 sa mga araw ng Miyerkules sa buong buwan ng Agosto para sa mga pasaherong may National ID.

Ayon sa MRT-3, epektibo ang Libreng Sakay mula 9:00 hanggang 11:00 ng umaga, at mula 6:00 hanggang 8:00 ng gabi para sa August 6, 13, 20, at 27.

Ang Libreng Sakay ay alinsunod sa layunin ni Pangulong Ferdinand “Bongbong” Marcos Jr. na mapalaganap ang paggamit ng National ID, para sa mas madaling mga transaksiyon, pampubliko man o pribado, at mas mabilis at inklusibong paghahatid ng mga serbisyong panlipunan.

Maaaring iprisinta ang physical card, printed paper, o digital copy version ng National ID sa security personnel sa service gate ng mga istasyon para sa Libreng Sakay. (DDC)