Mga basurero na nasabugan ng air compressor sa Tondo, makikinabang sa Zero Billing ayon sa DOH
Tiniyak ng Department of Health na walang gagastushin ang anim na katao na nasugatan makaraang masabugan ng air compressor sa Tondo, Maynila noong Linggo.
Ayon sa DOH, nasa Jose R. Reyes Memorial Medical Center ang anim na pasyente at masasakop sila ng “Bayad na Bill Mo Program” o Zero Balance Billing sa basic accommodation sa DOH hospitals.
Sa update mula sa DOH, tatlo (3) sa mga biktima ang sumailalim na sa operasyon at nagpapagaling sa surgical intensive care unit, habang ang isa ay nasa surgical ward at naka-schedule ding operahan dahil sa tinamong facial injury.
Pinakabata sa mga nasabugan ang katorse (14) anyos na lalaki na nagtamo ng traumatic brain injury, multiple fractures sa magkabilang binti, matinding pinsala sa kanang braso, at mga galos mula ulo hanggang dibdib.
Habang ang dalawang pa sa mga nasugatan ay nakauwi na makaraang magtamo ng mild injuries. (DDC)
