May-ari ng SUV na nakabangga at umabandona sa rider sa QC inisyuhan ng show cause order ng LTO

Nagpalabas ng show cause order ang Land Transportation Office sa may-ari ng isang SUV na nalasagi at umabandona sa isang motorcycle rider sa Quezon City.

Ayon kay LTO Chief, Assistant Secretary Atty. Vigor D. Mendoza II, natukoy ng ahensya ang rehistradong may-ari ng Land Cruiser habang inaalam pa kung sino ang nagmamaneho ng sasakyan ng mangyari ang insidente.

Sa sandaling makumpirma kung sino ang nagmamaneho ng SUV ay agad sususpendihin ang lisensya nito.

Sa imbestigasyon, nabangga ng Land Cruiser ang motorsiklo noong July 11 sa Commonwealth Avenue sa harap ng UP Technohub-hindi man lamang huminto ang driver ng SUV at iniwan ang sugatang rider.

Inatasan ng LTO ang may-ari ng SUV na humarap sa Intelligence and Investigation Division ng ahensya sa August 7, 2025. (DDC)