PhilSa kinumpirmang natuloy ang rocket launch ng China; publiko sa Puerto Princesa at sa bahagi ng Tubbataha Reef Natural Park pinag-iingat sa debris

Kinumpirma ng Philippine Space Agency na itinuloy ng China ang paglulunsad ng “Long March 12” rocket ngayong Lunes, August 8 ng gabi.

Ayon sa pahayag ng PhilSa, inilunsad ang “Long March 12” rocket mula sa Hainan International Commercial Launch Center sa Wenchang, Hainan dakong alas 6:21 ng gabi oras sa Pilipinas.

Sinabi ng PhilSa na ang mga debris mula sa rocket ay maaaring bumagsak sa 21 nautical miles ng Puerto Princesa, Palawan at sa 18 nautical miles ng Tubbataha Reef Natural Park.

Ayon sa PhilSA bago ang launching ng rocket ay nagpakalat na ito ng impormasyon sa aktibidad at inabisuhan ang mga concerned na ahensya ng gobyerno at mga otoridad.

Sinabi ng PhilSa na bagaman hindi naman inaasahang babagsak sa kalupaan ang debris, ay maaaring delikado ito sa mga barko, aircraft, bangkang pangisda, at iba pang uri ng sasakyang pandagat na maaring dumaraan sa drop zone.

Paalala ng PhilSa sa publiko, huwag lalapitan o hahawakan sakaling may makitang debris dahil maaaring nagtataglay ito ng toxic substances gaya ng rocket fuel, at sa halip ay agad itong ireport sa otoridad. (DDC)