13-anyos inaming pinatay niya sa sakal ang 9-anyos na batang babae sa QC

Tiniyak ng Quezon City LGU na tututukan nito ang kaso ng pagpatay sa isang 9-anyos na batang babae na natagpuang wala nang buhay sa Barangay Sta. Lucia, Novaliches.

Sa paunang imbestigasyon ng Quezon City Police District nakita ang walang buhay na batang babae sa bakanteng lote at nasa tabi nito ang kaniyang underwear at short pants at isang patalim.

Base sa CCTV, nakitang huling kasama ng biktima ang isang 13-anyos na batang lalaki na kalaunan ay umaming pinatay niya sa sakal ang biktima.

Sa pahayag ng Quezon City LGU, mariing kinondena ang karumal-dumal na krimen at nagpaabot ng pakikiramay sa pamilya ng biktima.

Tiniyak din ng LGU na magbibigay ng kinakailangang serbisyo at pag-alalay ang Quezon City Social Services Development Department sa pamilya ng biktima at ang pagsasagawa ng psychological debriefing katuwang ang Schools Division Office upang matulungan ang mga guro at mag-aaral dahil sa kanilang matinding emosyon dulot ng sinapit ng kanilang kamag-aral. (DDC)